Candhi Bangkal mapan ing dhukuh
Bangkal, desa Candiharjo, kecamatan Ngoro, kabupaten Mojokerto, Jawa Wetan.
Saka dalan gedhe Ngoro – Gempol ing sakulone masjid putih desa Wonosari ana
dalan ngalor. Dohe saka kono kira – kira rong kilometer. Candhi iki digawe saka bata, bisa dipesthekake
yen candhi iki gawean jaman Majapaitan.
Denah candhi awujud pesagi, madhep
ngulon, alange 6,25 meter, ujure 10 meter, dene dhuwure 10 meter. Ing sikiling
candhi ana undhak-undhakan kang tumuju menyang senthongan kaya kang tinemu ing
candhi Pari lan candhi Gunung Gangsir. Candhi luwih cilik yen katandhing karo
candhi Pari utawa candhi Gunung Gangsir. Ing dhuwuring plawangane candhi ana
ukiran watu andhesit awujud kala. Ukiran kala saka watu andhesit mau ana uga
ing temboking candhi kang madhep ngalor, ngetan lan ngidul. Ing ngarepe candhi
katon ana tumpukan bata, kira-kira arep kanggo gapuraning candhi.
Kahanane candhi iki wis akeh batane
kang kropos. Pancene durung nate direnovasi, mula perlu enggal-enggal didandani.
Ing wektu saiki saben bubar panen
para warga ing kono nganakake sedhekah
bumi nganggo nanggap wayang.
Tidak ada komentar:
Posting Komentar