TOPENG

Jaman kalalupa

jamane wong kasangsaya

janma polah lir arsa kasulah

ana wewujudan

tanpa sangkan tanpa paran

ngupadi kanca

kekucah redana

angumbar swara

anggantha mulya

kekiter angambah gurung

suwe

tan kambah ing we

nunjem dhadha

sumlempit  selaning iga

nulya cidra

lamun kuwasa

Jaman kalalupa

jamane wong kasangsaya

ana sabawa

tansah memalat sih

dumeling  jroning galih

ngrerepa kawula dasih

andhudhah angen-angen

ngupadi kanthi

anggantha mukti

kekalangan ing langit

nrabas kang sarwa lungit

tan kinira

amung topeng walaka.

Surabaya, 13-1-2014

Gambar saking : gudangtari.blogspot.com