LINDHU

pethite hyang hanantaboga mobat-mabit bumi gonjing moyag-mayig gunung jugrug geter pater lindhu sedina ping pitu segara kinebur  alun gulung gumulung mawalikan gedhong ketekuk ambruk  dalan bengkah lemah growah, jarene si kaki  dhalang

jerit kumandhang teka pungkasane langit

tangis angiris lumaris teka pinggir cakrawala

sambat sambat angebeki keblat papat

donga-donga mbelah akasa

tangan -tangan njaluk tulung kang maha aweh pitulung

manungsa pating bilulung

kekitrang golek pepadhang

lamun donya wis suthik dadi kanca

lamun banyu wis ora kena kanggo kemu

lamun lemah wis ora kena kanggo njangkah

lamun bumi wis ora kena dienciki

segara mutah

mblebeg nguntal gisik

apa manungsa wus lali marang kang kawasa anyipta

apa manungsa wis nalisir saka anggering paugeran

apa manungsa wis silib kang dadi wajib

apa manungsa wis kepingin oncat saka kodrat

muga-muga mung elik-elik manungsa kang kedlarung ngumbar angkara

coba apa siksa ?

lamun siksa

apa manungsa wis minger keblate panembah

tangan-tangan manungsa wis ora wedi dosa

janji-janji kandheg ana ing lathi

kelem ing segara lali

amung tansah ambebujung

gusti kang aran redana

gebyaring bandha liringing netra lan empuking panguwasa

muga-muga iki mung coba

rada moncot sethithik

satemlik ana panggawe nistha

tega laku candhala

tega njarah jatah

kang nembe susah

surabaya, 02092018