Candhi Gunung
Gangsir mapan ing dukuh Kebon Candhi, desa Gunung Gangsir, Kecamatan Baji,
Kabupaten Pasuruan, Jawa Wetan.
Candhi iki
digawe saka bata, kahanan saiki wis didandani (direnovasi) kanthi becik. Mula yen
disawang katon jenggereng, mrebawani.
Platarane katon resik greminning, dikupengi taman kang tumata apik.
Candhi iki
miturut cakrik lan wangune meh padha karo Candhi Pari ing Porong. Mula kira-kira wae sajaman karo Candhi
Pari. Yaiku jamane Prabu Hayam Wuruk. Yen
ing Candhi Pari tinemu angka taun 1293 Ç utawa taun 1371 M ing candhi Gunung Gangsir ora
tinemu katrangan kang nuduhake angka taun. Candhi iki kalebu candhi agaman Budha.
Candhi iki
tundha papat (empat lantai), madhep
ngetan. Saka plataran ana undhak-undhakan kang tumuju marang lawang senthongan.
Dhuwure lawang senthongan kira-kira 5 meter saka lemah. Sikile candhi awujud pesagi
kanthi ukuran 15 x 15 m. Dhuwure
kira-kira 17 meter. Ing wektu iki
senthongan mau wis bisa diunggahi lan dileboni.
Ing sakidule
dhukuh Kebon Candhi ana dhukuh Derma.(Dermo). Yen nitik jenenge dhukuh Derma
bokmanawa biyen-biyene candhi iki kanggo “pendarmaan” utawa kanggo makam. Mung wae sapa sing dimakamake ing kono durung
ana katrangan kang gumathok.
Tidak ada komentar:
Posting Komentar