PATILASAN KRATON MAJAPAIT (9)

CANDHI RIMBI

Candhi Rimbi  diarani  uga Cungkup Pulo ora mapan ing desa Ngrimbi nanging mapan ing desa Pulosari, Kecamatan Bareng Kabupaten Jombang, Jawa Wetan.  Papane  Candhi Rimbi  sakidule  desa Ngrimbi , kira- kira rong kilomateran.  Ambane situs Rimbi ana 396, 56 meter pesagi. Saka Mojoagung kira-kira 20 kilomateran  ngidul arah menyang kecamatan Wonosalam.  Saka  pratelon Majadhuwur – Bareng  dalane wiwit munggah. Candhi iki mapan ing papan kang rada dhuwur. 

Candhi Rimbi  madhep mangulon. Wangunan candhi Rimbi  kedadean saka watu andesit nanging pondasine digawe saka  bata, kaya lumrahe candhi-candhi Majapaitan.  Candhi Rimbi nduweni ukuran dawane 13,24 meter, ambane 9,10 meter lan dhuwur 12 meter. Ukurane meh padha karo candhi Surawana lan Tegawangi.   Ing temboking candhi ana relief kang nggambarake kewan-kewan lan crita kang nganti saiki durung kaweruhan  critane  apa lan sapa.

Ing temboking candhi sisih kidul ana relief sing cacahe 8 iji, sisih wetan ana relief 17 iji lan sisih lor ana 17 iji. 

 Gambar  relief yen diurut saka lawanging candhi arah manengen (suwalike pandoming  jam)

1. Wong wadon kang lagi nggendhong bayi, lan gambar kucing ing sisih tengen ngisor
2. Gambar bocah lungguh ing ndhuwurebocah mau ana gambar iwak (manuk) kang nganggo swiwi.
3. Gambar bocah loro padha jejogedan (tukaran)
4. Wong wadon menehake slendhang marang wong lanang
5. Wong wadon kang lagi turon lan ong lanang ngadeg ing sacedhake.
6. Gambar wong madhep ngiwa
7. Gambar wong lagi nguleg barang (jamu) ing lemper  (layah ) lan ngadhep mangkok kang ana tutupe.
8. Gambar wong lagi  mlayu-mlayu.
9. Gambar wong lagi mlayu nggawa barang
10. Gambar wong mlaku
11. Gambar wit-witan (alas ?)
12. Gambar kethek
13. Gambar wong loro lagi padha rembugan, ing tangah ana gambar mangkok
14. Gambar wong lagi nyekel cagak
15. Gambar kethek
16. Gambar kethek
17. Gambar wong loro ing sisih tengah ana bocah lagi menek wit.
18. Ora cetha
19. Gambar tengkelan  kayu (gulungan kertas, bantal ) ing sadhuwure meja ( paturon ?)
20. Gambar kembang
21. Gambar wong
22. Gambar wong
23. Ora cetha
24. Wong  ana ing sajrone banyu mung katon sirahe
25. Gambar wong
26. Gambar wong tangane kiwa  dtempelake lemah
27. Gambar wong kang tangane kiwa nyekel sirah (lagi menehi pangestu ? ) marang wong kang wujud nduweni cucuk  dawa  kaya manuk.
28. Gambar kethek cacah loro
29. Gambar wong (brahmana ?)
30. Gambar guci diiseni (dileboni )  bocah (wong) loro
31.  Gambar wong macul lan wong nggawa payung (arep menyang pasar ?)
32. Gambar wong mlaku mbungkuk (wis tuwa ?)
33. Gambar wong macul (nggawa kayu ?,  nyambut gawe ?)
34. Gambar wong nggawa kurungan, arep ngurungi wong kang asirah kewan  (?)
35. Gambar srengenge kang ing jerone ana wong loro (bathara Surya ?)
36. Gambar bocah (wong ) telu lelumban (adus) ing kali, sing siji mung katon sikile
37. Gambar bocah loro ana ing tengah alas lagi nggawa tulup manuk  (?)
38. Gambar  omah kang isi gajah (kraton ?)
39. Gambar wong mlayu nggawa payung
40. Gambar wong ngadeg
41.  Gambar wong (bocah) adus ing kali tuding-tudingan
42. Gambar wong mlaku
43.   Gambar bocah loro lagi padha rembugan
44. Gambar wong loro , siji lungguh siji ngadeg
45. Gambarmanuk loro ing pang lagi ngoceh, mencok ing pang.

Adhedhasar arsitektur seni Candhi Rimbi  kalebu candhi Hindhu, ing jerone candhi ana  reca Parwati, garwane Dewa Siwah sing saiki sinimpen ing Gedung Museum Nasional ing Jakarta.  Ing platarane candhi ana  reca-reca kang asipat agama Hindhu.

Jeneng Rimbi digathukake karo crita wayang dewi Arimbi, garwane raden Werkudara ya panenggak Pandhawa. Dewi Parwati nggambarake Tri Bhuwana Tunggadewi kang ngratoni Majapait taun 1250 C (1328 M)  – 1272 C (1350 M)  Masehi.

Miturut critane warga ing kono ing desa Ngrimbi ana kuburane Dewi Arimbi kang karan Cungkup Pulo.

RSBI BUBAR !!!

Wusanane RSBI lan SBI bubar. Mahkamah konstitusi ngabulake gugatan permohonan uji materi  pasal 50 ayat 3 UU nomer  20 taun 2003, ngenani Sistem Pendidikan Nasional (UU Sisdiknas)  sing ngatur prekara  Rintisan Sekolah bertaraf Internsional (RSBI). Nalika maca amar putusan , Ketua Mahkamah Konstistusi , Mahfud MD kandha yen pasal 50 ayat 3 UU Nomer 20 taun 2003 lelawanan karo UUD 1945  lan ora nduweni kekuwatan hukum kang ngiket. Kanthi keputusasan iku MK mbubarake 1300 an sekolah kang nyandhang RSBI  / SBI lan penyelenggaran satuan pendidikan berkurikulum internasional ora diidini  maneh.

Alasan-alasan mbubarakeRSBI antara liya :

Satuan pendidikan bertaraf internasional lelawanan karo kuwajibane negara kanggo minterake bangsa. Negara  nduweni kuwajiban kabeh warga negara oleh pendidikan kang becik saka Negara. Pendidikan sing becik ora mung hake   RSBI lan SBI.  Kamangka RSBI lan SBI  danane  diglontor  saka APBN  kapara  luwih gedhe kanggo alas an-alasan  ningkatake mutu kareben sejajar  karo masarakat  internasional. Sanajan wis oleh glontoran dana saka APBN kanyatane RSBI isih diidini  narik dana saka masarakat.

Satuan pendidikan bertaraf internasional nimbulake dualism system pendidikan. Kanthi anane label internasional bakal nuwuhake beda-bedane kurikulum, metode, sarana lan prasarana , sarta fasilitas-fasilitas penunjang  liyane. Lamun ana  kekurangan danane banjur  ditarikake saka masarakat. Sanajanta ana alesan sumbangam sukarela saka masarakat.

Satuan pendidikan bertaraf internasional wujud liya saka  liberalisasi pendidikan.

Satuan pendidikan bertaraf internasional nimbulake diskriminasi lan kastanisasi bidang pendidikan. Cetha yen Satuan pendidikan bertaraf internasional wusanane bakal mbedak-mbedakake lan nuwuhake jurang antarane wong sing sugih karo wong sing mlarat. Wong sing sugih lan wong pangkat bisa mlebu ing RSBI, jalaran wonb sugih nduweni samubarang fasilitas kanggo minterake anake. Dene wong mlarat ora bakal bisa mlebu , jalaran kemampuane winates. Sanajanta aturane 20 persen kanggo masarakat miskin, nanging nyatane durung karuwan yen kuota semono iku ditaati.  

Satuan pendidikan bertaraf internasional nduweni potensi ngilangake  jati diri bangsa Indonesia sing nganggo basa Indonesia. RSBI nganggo pengantar basa Inggris, sethtithik akeh bisa ngikis nasionalisme lan jati diri bangsa Indonesia. Murid – murid  ora ngregani basa daerah minangka basa ibu, basa Indonesiane padha pating pecothot  kacampuran basa Inggris.

Sawise RSBI lan SBI dibubarake ana sawijining pejabat ing Kem Diknas  sing kandha yen bakal arep dianakake sekolah mandiri ? Kaya ngapa lan kepriye babare sekolah mau, apa nasibe kaya RSBI? Kita tunggu wae kabar sateruse.